/202/ De coelo dissolvit dubia compluria circa coelestia
corpora, cur multa sint, cur diversis
moveantur motibus, etc. ex ipsorum ordinatione
in haec inferiora. Quare Alexander et Averroës
ibidem, secundum mentem Aristotelis, adnotarunt
Deo haec inferiora curae esse. In libro De
bona fortuna ostendit voluntates humanas
a Deo moveri et in Moralibus viros studiosos
Dei amicos esse testatur. Chalcidio autem,
in divini Praeceptoris libris minus versato,
in re ignota licuit vel libuit potius
exultare.
EXERCITATIO XXXI
Respondet primo argumento.
Quod erat desumptum ex 12. Primae
Philosophiae, ubi Aristoteles docet primam
mentem nihil extra seipsam intelligere.
Scholastici, in i Sententiarum, dist. 35., respondent distinctionem
de duplici obiecto afferentes;
idque varie.
Divus Thomas arbitratus est primum quod
intelligitur esse rei similitudinem in intellectu
conceptam; secundum esse rem, quae
per ipsam intelligitur similitudinem, quod, si
referatur ad Deum, nihil eum primo aliud
intelligere quam se, utpote qui non hauriat